Archives for posts with tag: stupidity
« Older Entries

9 Кејски заповеди

June 15, 09 //
0

    1. Лентата на Кејот е само твоја лента;
    2. Да се мрднеш дури и ако ти ѕвонат е грев;
    3. Не ги почитувај другите што возат по лентата;
    4. Ако ти се посака одеднаш да застанеш на лентата, нека биде волјата твоја;
    5. Тревата постои за оние што сакаат да шетаат да одат по она малку асфалт што постои за велосипедите и ролерите;
    6. Секогаш паркирај го точакот на лентата кога правиш пауза;
    7. Единствен начин како да ја докажеш љубовта е да се држите со дечкото/девојката додека ролате ролери, оти било што поинаку ќе значи апокалипса за вашата врска;
    8. Од целиот кеј, поздравувањето со пријателите прави го на самата лента;
    9. Децата можат да научат како да возат ролери и точак *само* на лентата на кејот.

Нова година – нови политики на Владата

December 2, 08 //
2

КиберКотле ексклузивно дознава… Владата од идната година ќе ги почасти своите граѓани со ново министерство за семејство и родостопанство.

Истовремено, Владата најави дека данокот за живеење вон брачна заедница нема да важи на целата територија на Републиката туку ќе бидат изградени посебни логори каде тие луѓе ќе можат да живеат без да го плаќаат тој данок. Ресорните министерства се задолжени да ги најдат најдобрите локации а Православната црква најави инвестиција во тие туристички капацитети. Во меѓувреме, кафулињата и рестораните ќе мораат да обезбедат посебен простор за овие луѓе.

Како дополнување на поттикнувањето на семејните вредности, преку стимулација на многудетни семејства и оданочување на расипничкото живеење вон брачна заедница, неофицијално се дознава дека Владата ќе наметне и акциза на контрацептивни средства, па меѓу другото, од први јануари едно пакетче кондоми ќе чини 1000 денари од кои 900 денари ќе одат во буџетот.

Експертите се поделени. Од катедрата за биологија на Теолошкиот факултет изјавија дека контрацептивните средства се дело на ѓаволот и дека не постои такво нешто како непосакувана бременост. Не заборавија да не потсетат дека нема постари фосили од 5000 години.

Увозниците на контрацептивни средства се затекнати но сеуште сметаат дека цената од 1000 денари е во рамките на финансиските можности на граѓаните.

Гласините од улицата велат дека федерацијата на локални шверцери веќе организирала семинар за најдобри искуства и практики во шверцот на кондоми и други средства. Нивниот гласноговорник, кој сакаше да остане анонимен, најави рамковна цена од 500 денари по пакетче.

„Независната лига за слободен секс“ веќе најави протести пред Владата а невладината организација М-ОРАЛ ќе држи курсеви за орален секс и друга граѓанска непослушност за што веќе обезбедиле мебел за различни сценарија и миризливи стапчиња.

Ме сака, не ме сака

June 5, 08 //
2

Не ми се верува… 23:47 05.06.2008 и на Собраниски канал веќе 20 минути оди жив пренос на пребројување на гласови во ДИК. Каков фантастичен телевизиски концепт, а воедно и транспарентност до немајкаде.

Ако веќе МРТ има финансиски проблеми, јас би предложил Собранискиот канал да интегрира смс интеракција со гледачите. Така, додека се пренесуваат седници на собрание, гледачите ќе можат да праќаат смс пораки со свои коментари по само 35 денари/порака. Политика во живо – лепак за луѓето кои сакаат да трошат многу пари на глупи смс-и.

Промена на зборови

April 4, 08 //
9

Како резултат на ветото на Република Грција за влез на нашата земја во НАТО, академици достоинсвеници од науката и културата, студенти, политичари властелини и бизнисмени почнаа иницијатива за исфрлање на грчките зборови и зборовите со грчки корен од употреба во македонскиот јазик.

Од тоа што досега се предложува:

    живонаука наместо биологија;
    мудрољубие наместо филозофија;
    република наместо демократија;
    либротека наместо библиотека;
    пример наместо парадигма;
    стопанство наместо економија;
    …

Жешка дебата се води околу замената за „политика“, „археологија“, „педагогија“, „техника“, „психологија“ и многу други. Од МАНУ изјавија дека ова ќе биде најголемата ревизија на македонскиот јазик после воведувањето на кирилицата.

Повеќезначноста на зборот „логос“ кој се наоѓа во многу зборови во нашиот јазик ќе претставува гордиев јазол кој тешко ќе се реши – ни изјави анонимен извор од Филолошки факултет, чешајќи се по главата

Заводот за стандардизација упати известување до ISO и NIST каде ги известува дека ќе се напушти конвенцијата за употреба на грчки зборови во мерните единици. Првичните предлози се да се користат исклучиво латинските зборови кои досега се користеа за означување на помали мерки од основната. Останува да се види како ќе се имплементираат латинските називи за вредности над основната единица мерка. Некои циници укажуваат на тоа дека со невлегувањето во НАТО, во Република Македонија нема да може ни да се измери нешто со повисока вредност.

Според Владата, до крајот на 2008, од употреба ќе се исфрлат: дека, кило, мега, гига…

Најголем удар со оваа промена доживува математиката, која покрај тоа што ќе треба да си го смени името, ќе мора да заборави на Питагорината теорема и Пи, па од 2009 година, пресметките на плоштина на круг и триаголник ќе мора да бидат аутсорсирани во некоја од соседните земји.

Останува да видиме до каде ќе не доведе оваа политика.

Дополнување: Според извори од МПЦ, Синодот размислува да престане да го користи грчкото име на Спасителот Исус Христос, туку да го прифати еврејско-арамејскиот назив Јешуа Месија.

« Older Entries