Archives for category: линукс

Шчо напраифме?

Долгоприготвуанит и многоочекуанит хаклаб напоследок излезе на јава. Нашите другари си покажаа сета jунашчина и готовност да се пожртвуат за интересите на својот хаклаб. Борбата беше и јет отчајана.

Но главно, ке се поможит на нашијот народ со културно работајн’е, а нај поеке со просветуајн’ето.

[/Крсте]

На 17.10.2009 заедницата на корисници на слободен софтвер ќе си добие свој културен простор, свое катче… свој хаклаб.

Што тоа значи?

Веќе подолго време, таков простор беше стремеж на неколкумина посветени активисти, кои свесно или несвесно, и во соработка со поширок круг на луѓе ја изградија агендата на заедницата на корисници на слободен софтвер во Македонија, која уште од самите почетоци беше посветена на ентузијастичка промоција и ширење на вредностите кои ги застапува движењето за слободен софтвер. Подоцна, во активностите се инкорпорираше и идејата за слободна култура.


сподели знаење во претходниот простор

Овие идеи, низ низа активности на заедницата, но и на „Слободен софтвер Македонија“ на крајот се сретнаа во нешто што го нарековме „Сподели“, кое претставува множество на активности, за почеток „Сподели знаење“ и „Сподели кино“. Токму тие активности не натераа да ја заокружиме приказната околу хаклабот и да се обидеме да го обезбедиме. Тоа и се случи.

сподели + знаење = заедница (статија во глобус)

сподели + знаење = заедница (статија во глобус)

Тоа што е интересно е што на крајот, после низа обиди да обезбедиме финансии од донатори, хаклабот го обезбеди заедницата на ентузијасти. Едно големо благодарам до сите оние кои помогнаа.

Што ќе се прави понатаму?

Хаклабот ќе биде место на еманципација. Место каде што ќе може да се научи како да се користи слободна технологија и како понатаму да се сподели тоа знаење. Таму веќе се случува „Сподели знаење“, бргу ќе се реставрира „Сподели кино“, а веќе, како што гледам, место нашле и иницијативи на други „технолошки интересни групи“ кои сакаат да одржуваат работилници, како Ruby групата на програмери.

Точка - каде порано се одржуваа „Сподели“ активностите

Точка - каде порано се одржуваа „Сподели“ активностите

Мене лично, ми е криво што не сум таму да бидам кога сето ова ќе се случува. Но знам дека ќе заживее…

Дојде време да го пензионирам мојот Thinkpad z60t на определено време. Не дека нешто му фали (освен батерија) но ми треба нешто уште помобилно…

Enter the EEEPC 1000HE, еден од поновите нетбуци на Asus кој наводно издржува и до 9,5 часови без да го уштекате во струја. Инаку, како и кај сите нетбуци, конфигурацијата стандардна – Intel Atom процесор, 1 гига рам и сл… Овој нетбук користи ralink2860 wireless чипсет што е добро и лошо :-)

1000he-box

Да почнам од почеток…

Asus, како еден од поголемите промотори на Windows на нетбуци (а можеби и воопшто), се погрижи приказната со овој оперативен систем бргу да заврши. Производителот нуди и Gnu/Linux верзии на некои од своите нетбуци, но за жал, таква верзија за овој нетбук не постои. Како мое оправдувања зошто го купив овој, а не некоја линукс варијанта, си ги земам долготрајната батерија и испакнатите копчиња на тастатура, кои ќе им олеснат на моите подебелички прсти да пишуваат без многу мака.

Мене Windows не ми треба, но кога веќе сум го платил бев решен да го „заспијам“ во дуалбутот, и тоа без да ја прифатам лиценцата и фактички никогаш не го активирам Windows-от.

eula-before-we-continue

Иако ја одбив EULA-та на Мајкрософт, кога го стартував Ubuntu-то, видов дека Asus распослале глупости низ повеќе партиции. Ако не се лажам, на 3 партиции имаше околу 13 гигабајти веќе употребени. Одеднаш, „заспивање“ на Windows стана претешко. Толку беше моето дружење… со Windows. Партициите на Asus отидоа… и на нетбукот се насели Ubuntu 9.04 Netbook Remix.

Ubuntu 9.04 NR на EEEPC 1000HE во неколку чекори:

1. го симнувате .img фајлот и го снимате на претходно испразнето usb стикче (или sd картичка), освен ако ете баш сакате да си ги изгубите податоците.

2. Проверете го интегритетот на симнатиот имиџ преку md5sum проверка. Во Gnu/Linux отприлика оди вака:
md5sum фајлот
Нормално, сумите треба да се совпаѓаат со специфичната сума на конкретниот фајл која можете да ја најдете тука.

3. Не знам за Windows, но откако ќе го симнете потребно е да го запишете имиџот на usb стикот. Во Gnu/Linux најбргу си ја завршувате работата со:
dd if=патека до фајлот of=уред (најчесто /dev/sd(x))
За снимање повеќе инфо тука.

4. При бутирање, изберете го стикчето да бутира прво. Така ќе се покрене Ubuntu-то и понатаму е лесно :-)

ubuntu-remix

Отприлика, сите работи функционираат од почеток, па и bluetooth-от. Единствен видлив проблем беше нефункционалноста на wireless уредот, односно неможноста да се поврзе на мрежа. Проблемот е уредно документиран на интернет, а јас најбргу го решив проблемот инсталирајќи претходна верзија на драјверот, практично заменувајќи ја онаа која доаѓа по дифолт со 9.04.

Јас прибрав debian пакет од:

http://www.array.org/ubuntu/dists/intrepid/eeepc/binary-i386/rt2860-dkms_1.7.1.1_all.deb

Го „избришав“ новиот баговит драјвер:

cd /lib/modules/2.6.28-11-generic/kernel/drivers/staging/rt2860/

sudo mv rt2860sta.ko rt2860sta.bak

И го инсталирав новиот драјвер. За оние што почнуваат во Ubuntu – само кликнете на фајлот, понатаму ќе сфатите што сакате да правите.

Сега системот е „скоро“ среден. Останува да го стишам уште малку, дискот е побучен од оној на Thinkpad-от и тука неможам ништо да направам, но постојат скрипти кои добро менаџираат со функционалноста на хардверот. Дополнително, овој нетбук има мултитач тачпед кој не работи по дифолт со графичкиот сервер во Gnu/Linux и потребно е дополнително да се подеси.

За добро, немам што уште да додадам – хардверот кај сите нетбуци е скоро ист, а конструкцијата на овој нетбук делува цврсто.

Тоа што е лошо е што нема трекпоинт, а јас како неколкугодишен корисник на таа направа, осеќам дека ќе имам проблеми да се привикнам на тачпед, кој е инфериорна направа за покажување и според брзина и според ергономија.

Десниот shift е премал, и веројатно секому ќе треба подолго време да се привикне.

keyboard

Сеуште е рано да се каже колку овој нетбук може да биде добра екстензија на просечен гик… Читајте ми ги твитовите – ако се жалам, не го купувајте ;-)

До појавата на Ubuntu, користењето на Gnu/Linux секогаш беше поврзувано со некаква специјална вештина која корисникот треба да ја поседува за да воопшто почне со било што…

Јас лично, никогаш не сум бил некаков power user ниту за Windows ниту сум сега на Gnu/Linux, но од моето лично искуство, времето потребно да се прилагодам на новиот оперативен систем не беше долго. Нормално, тука секогаш беше/е помошта од оние кои користат слободен софтвер, но таква помош ми требала и кога сум користел Windows. Иако јас никогаш не ја купив идејата дека Gnu/Linux e реално потежок за користење, секогаш во дискусиите со луѓето преовладувало таквото мислење.

Fast-forward до 2009 година…..

Windows 98 прозорец за добредојде

Windows 98 прозорец за добредојде

Ја имав таа прилика да инсталирам Windows 98 на еден стар компјутер (Интересно ќе беше доколку можев да инсталирам Gnu/Linux, ама потребите беа поинакви). Инсталацијата траеше нешто помалку од еден час. Немав никакви проблеми, но инсталацијата на Windows 98 воопшто не е наивен процес. Најголемиот проблем беше отсуството на било каква информација како да се покрене инсталацискиот процес, откако е бутирано со ситемска/стартап дискета. Ниту има опис каде стои програмот за инсталација, ниту како да се дојде до него. За разлика од тоа, најстарата инсталација на Gnu/Linux која ја паметам беше Slackware. Добро, користеше поедноставен систем кој бутираше од самото CD, но паметам дека командите кои корисникот мораше да ги даде за да почне инсталацијата беа убаво опишани и видливи, па почетник би знаел што треба да прави.

Состојбата сега е далеку поразлична. Инсталирањето на Gnu/Linux денес и видливо е подобро ориентирано за почетници и/или оние кои сакаат на брзина да ја искликаат инсталацијата.

Денес, во мојот автомобил со Дамјан пренесувавме софтвер во вредност од најмалку 2.500.000$. За што се работи?

Инет АД донираше 5000 Fedora Linux дискови на „Слободен софтвер Македонија“. Ако се земе предвид дека Windows XP чини 100$ а Microsoft Office 400$ тогаш, може да се претпостави дека цената на еден диск кој содржи оперативен систем и канцелариски пакет би чинел 500$. Бидејќи Fedora Linux содржи GNU/Linux оперативен систем, а истовремено содржи и OpenOffice.org пакет за канцелариска продуктивност, тогаш можеме да претпоставиме дека доколку вредноста на XP+MsOffice е навистина 500$, тогаш вредноста на Fedora Linux е најмалку исто толку, иако Fedora-та содржи многу повеќе од тоа.

Нормално, нашата намера не е да продаваме, туку да ги искористиме за да промовираме слободен софтвер преку донирање на овие дискови на различни организации и индивидуи. Како и да е, еве некоја перспектива колку 2.500.000$ изнесуваат. Со таа цифра може да се купи:

    1. 23.363 Linksys WRT54GL безжични рутери со линукс
    2. 68 Opel Vivaro комби возила за гикови
    3. 1827 Lenovo X61s лаптопи за хакерот во сите нас
    4. 6250 Asus EEEPC компактни 7 инчни лаптопи за да ви обрнуваат внимание на не-гиковски места
    5. 250.000 8-битни кравати за да ја ширите гиковштината и во јапи светот
    6. 14.705 бинарни рачни часовници за да само вие знаете колку е часот.

Нормално – вредноста од 500$ е претпоставена вредност. Ова е само интересен пример и весела математика за тоа колку навистина може да се заштеди само ако не се набават Мајкрософт производите. Дури и понатаму, користејќи слободен софтвер заштедувате на многу скриени трошоци кои ги носат неслободните софтверски пакети.

Општествените користи се уште поголеми, можејќи за релативно малку пари да донирате толку многу софтвер, кој е квалитетен, лесно се шири понатаму и никој не е крив ако го ископира или позајми дивидито за да му помогне на својот пријател.