Џева се крена за новиот туристички спот во режија на Милчо Манчевски… Мене спотот сам по себе ми се допаѓа, ама не мислам дека е корисен за туристичка промоција. Тука највеќе се согласувам со Архео, која отприлика вели дека каков и да е спотот, не постои капацитет кој би ја овозможил таквата туристичка понуда.

Тоа што мене ми пречи се мегаломанските слогани кои ги измислуваме за туристичката промоција. Последниот – Timeless / Безвременска. Каква врска со реалноста на било кое ниво има таквиот слоган? Што значи тоа? Каква врска има тоа со туристичката понуда во државата? Како тоа не разликува од другите држави? Традиција? Сите држави имаат традиција, а ако ја немаат, почвата им има традиција. Зошто едноставно не ги земеме двата стереотипа кои владеат за нас (гостопримство и добро јадење) и сковаме туристичко мото.

Мислам… јасно ми е од каде излегло ова timeless… ама мене супер ќе ми биде денот кога ќе престанеме да мислиме дека сме некоја супер голема и битна светска приказна, и кога некој ќе предложи а друг ќе усвои дека најдобро националистично мото за убавините на нашата земја би било:

„Ако Балканот беше Синди Крафорд, Македонија ќе беше бемката“